මෙතෙක් වචනයට පමණක් සීමාවූ “සිටි බස්” අධි සුඛෝපභෝගි බස් රථ සේවාව අදින් ඇරඹෙයි!

“සිටි බස්” අධි සුඛෝපභෝගි බස් රථ සේවාව අද (15) ආරම්භවීමට නියමිතය.

පළමු අදියර යටතේ කොළඹ ප්‍රදේශය අවට කාර්යාලවල රාජකාරී සඳහා ගමන්කරන මගීන් වෙනුවෙන් මාකුඹුර සිට පිටකොටුව දක්වා බස්රථ සේවාව ක්‍රියාත්මක වන බව වාර්තා වේ.

ජනාධිපති ගෝඨාභය රාජපක්ෂ  මහාතාගේ ප්‍රධානත්වයෙන් මෙම අධි සුඛෝපභෝගි බස් රථ සේවාව  මාකුඹුර බහුවිධ ප්‍රවහන මධ්‍යස්ථානයෙන් ආරම්භ කෙරෙන බව ලංකා ගමනාගමන මණ්ඩලයේ සභාපති කිංග්ස්ලි රණවක මහතා පැවසීය.

“අද දිනයේදී මාකුඹුර සිට පිටකොටුව දක්වාත් පිටකොටුවේ සිට මාකුඹුර දක්වාත් 138 මාර්ගයේ සහ බත්තරමුල්ල ඔස්සේ මෙම සිටි බස් සේවාව ආරම්භ වෙනවා. පාර්ක් ඇන්ඩ් රයිඩ් කියන සංකල්පය මත මෙම සේවාව ආරම්භ වෙන්නෙ. අධික රථවාහන තදබදයක් සමග ගමන් කරන කාර්යාල පිරිස් ඉවත් කරගෙන මෙම බස්රථවලට ලබා ගැනීම තමයි ඉන් අපි බලාපොරොත්තුවෙන්නේ. ඒ වගේම කාර්යක්ෂමව ඔවුන්ගේ සේවා ස්ථානවලට ඔවුන්ව රැගෙන යෑම. සෑම මිනිත්තු 10කට වරක්ම මේ බස් රථයක් ඒ මාර්ග ඔස්සේ ගමන් කරනවා. ගාස්තුව සාමාන්‍ය ගාස්තුව වගේ දෙගුණයක්.”

“Park and Ride ” ක්‍රමවේදය පිළිබඳව මෙරට බොහෝ දේශපාලකයින් මෙන්ම පැවති රජයන් කතා බහ කලත් එය යතාර්ථයක් බවට පත් කිරීමට නොහැකි වූ අතර ඒවා වචනයට පමණක් සීමා වූ අකාරය අපට දකින්නට ලැබුනා, නමුත් වර්තමාන රජය ජනාධිපති ගෝඨාභය රාජපක්ෂ මහතාගේ සෘජු උපදේශකත්වය මත මෙම ක්‍රමවේදය ක්‍රියාත්මක කෙරුණු අතර ඉදිරියේදී කොළඹ අගනගරයේ රථවාහන තදබදය සැලකියයුතු අන්දමින් අවම කිරීමට මෙය හේතු වනු ඇත.