රනිල්ගේ උගුලේ සජිත් පැටලේ.. ජනාධිපති අපෙක්‍ෂක තේරීම කෘත්‍යාධිකාරී මණ්ඩලයට.. බහුතරය රනිල් සකසාගෙන අවසන්…

තවදුරටත් එක්සත් ජාතික පක්ෂ නායකත්වය සහ අගමැතිධුරය රනිල් වික්‍රමසිංහ මහතා කටයුතු කළාට තමන් කැමති බව එම පක්ෂ නියෝජ්‍ය නායක ඇමැති සජිත් ප්‍රේමදාස මහතා සඳහන් කර ඇත.

ඔහු ඒ බව සඳහන් කර ඇත්තේ අරලියගහ මන්දිරයේදී අගමැතිවරයා සමග සාකච්ඡාවේදීය.

ඉදිරි ජනාධිපතිවරණයේදී තමන් එජාප ජනාධිපති අපේක්ෂකත්වය බලාපොරොත්තු වන බවද ඔහු සඳහන් කර ඇත.

ඊට ප්‍රතිචාර දක්වමින් අගමැති රනිල් වික්‍රමසිංහ මහතා පවසා ඇත්තේ ජනාධිපති අපේක්ෂකයා විය යුත්තේ එය ජයග්‍රහණය කිරීම සඳහා ඡන්ද ලබා ගත හැකි පුද්ගලයකු බවයි.

එම අපේක්ෂකයා තමන් හෝ සජිත් ප්‍රේමදාස මහතා හෝ වෙනත් තුන්වන අපේක්ෂකයෙකු විය හැකි බව ද අගමැතිවරයා පෙන්වා දී ඇත.

එක්සත් ජාතික පක්ෂයේ සහ සන්ධානයේ නායකයා වන තම අපේක්ෂාව පක්ෂය ජයග්‍රහණය කිරීම බවත් ඒ සඳහා ඉදිරිපත් වී තරග කිරීමට තමන් පැකිලෙන්නේ නැති බවත් අගමැතිවරයා සදහන් කර ඇත.

ජනාධිපතිවරණය ජය ගැනීම සඳහා එක්සත් ජාතික පක්ෂයේ ඡන්ද පමණක් ප්‍රමාණවත් නොමැති බවද පවසා ඇති අගමැතිවරයා ආණ්ඩු පක්ෂය සමඟ සන්ධාන ගතව සිටින පක්ෂ සහ ඉදිරියේ දී එක්වීමට නියමිත පක්ෂව මෙන්ම දෙමළ ජාතික සන්ධානයයේද සහයෝගය ලබාගැනීම අත්‍යවශ්‍ය බවත් සජිත් ප්‍රේමදාස මහතා ජනාධිපති අපේක්ෂක වන්නේනම් ඒ සියල්ලන්ගේ සහාය ලබාගත යුතු බවද පවසා තිබේ.

ඒ අනුව ජනාධිපති අපේක්ෂකත්වය ගැන තීන්දුවක් ගැනීමට පෙර දෙමළ ජාතික සන්ධානය සහ ආණ්ඩුවේ සියලුම පක්ෂ සමග සාකච්ඡා කල යුතු බව ද අගමැතිවරයා සඳහන් කර ඇත.

එම ජනාධිපති අපේක්ෂකයාටත් එක්සත් ජාතික පක්ෂ කෘත්‍යාධිකාරි මණ්ඩලයේ අනුමැතිය ලැබීමෙන් පසු එය ‘ප්‍රජාතන්ත්‍රවාදී ජාතික පෙරමුණ’ නායකත්ව මණ්ඩලය අනුමත කළ යුතු බවද ඔහු සඳහන් කර තිබේ.

පසුගිය සතියේ දී අගමැතිවරයා එක්සත් ජාතික පක්ෂය ජේෂ්ඨයන් සමඟ සඳහන් කර තිබුණේ තමන් ජනාධිපති අපේක්ෂකයා ලෙසත් ඉදිරිපත් වීමට සූදානම් බවත් ඒ සඳහා අවශ්‍ය කෘත්‍යාධිකාරී මණ්ඩලයේ බහුතරය තමන්ට ඇති බවත්ය.

කෙසේ නමුත් සජිත් පිල කියා සිටින්නේ ජනාධිපති අපේක්‍ෂක තෝරා ගත යුත්තේ මන්ත‍්‍රී කණ්ඩායම හා කෘත්‍යාධිකාරී මණ්ඩලයේ බහුතර කැමැත්ත අනුව බවයි.